tg-me.com/moslamawoman/95142
Last Update:
مشهد مهم جدًا لشخصية تيته صفية
فى مسلسل رمضانى
تيته صفية قررت تشتغل فى السن دا
مش لأنها محتاجة لفلوس إنما عشان عايزة ونس و تواصل و إهتمام .
السنين بتعدى بينا من طفولة لشباب لنضج …
بنفضل نجرى و نعافر و نسابق و بننسى أن هيجى يوم علينا و سرعتنا غصب عنا لازم هتقل
لأن جسمنا هيضعف و طاقتنا هتكون محدودة
و رغبتنا فى حاجات كتير هتفتر و تميل للكفاية أو للزهد.
الحاجة الوحيدة اللى هتضمن لنا نعدى بسلام هذه المرحلة هى الذكر و الونس و العقل الشغال
أغلبنا فى رحلة الحياة و سنوات الجرى بنجرى ورا هدف واحد بس
اللى بيجرى ورا شهرة و سلطة
اللى بيجرى ورا مال و ثروة
اللى بيجرى ورا نجاح و إنجازات فى العمل
اللى بيجرى ورا اولاده و أسرته و مصالحهم
لما بيوصل لمرحلة تيته صفية
بيعرف أن اى حاجة مما سبق مش مكملة معاه زى ما كان متوقع.
الشغل له مدة و بعدها معاش او استغناء
المال مهما زاد هيفقد بريقه مع الاحتياج اللى بيقل أو قائمة الممنوعات بحكم السن
الأولاد هيكبروا و كل واحد فى دوامة حياته اللى كنا فيها فى سنه تمام.
للاستعداد لمرحلة تيته صفية
سمعت نصيحة من جدة جميلة من سنين
دخلت هذه المرحلة و بتعيشها بجمال و أمان و سلام
قالت ايه بقى يا ترى :
" لما بدأت أدخل على سن الخمسين و بدأوا اولادى يتخرجوا و يشتغلوا و يفكروا يكونوا أسرة و يستقلوا …
فهمت بعقلى الواعى أنى داخلة مرحلة جديدة فى حياتى محتاجة استعد لها عشان ما اغرقش فيها و أنا مش واخدة بالى ، عشان كده عملت التالى
-🔹سألت نفسى هل أنا راضية عن صحتى ؟ أكلى و نظام حياتى
بدأت اراجع الملف دا و انظمه
🔹- سألت نفسى هل اللى أنا بعمله دلوقتى بحبه و هيسسب رسالة و أثر ؟
راجعت الملف دا و لاقيت نفسى راضية عن اللى فات اللى كان مناسب ما مضى بس عايزة اكتشف شغفى اللى ممكن من خلاله اسيب بصمة . لاقيت نفسى بحب التنظيم و التخطيط ، بحثت و لاقيت فرصة أكون مع لجنة عمل تطوعى لتنظيم أعمال الخير لصالح دار أيتام و مسنين
🔹- سألت نفسى كام حد بيسأل عليكى و يتواصل كل يوم؟
لما لاقيت عددهم بيقل مش بيزيد عشان اللى اتوفى و اللى سافر و اللى هاجر و اللى عزل و اللى مشغول فى حياته و بقى بعيد. قررت اعمل دواير معارف جديدة
عن طريق إختيار الصحبة الطيبة، درس دين ، درس علم فى كورس ، ايفنت إجتماعى.
✅خمس سنين من سن ٥٠ لسن ٥٥
و أنا بخطط و ابحث و اقرر و أنفذ
و يعدها عشر سنين لغاية مل بقيت دلوقتى فى سن ٦٥ و الحمد قوة عقلى الشغال و تواصلى و قبلهم تقربى من ربنا أكتر من الأول خلونى لا أشعر بإى ضعف فى جسمى رغم وجود أمراض السن المعتادة .
الصحبة الجميلة بقوا متواجدين معايا و سندى فى أحيان كتير أكتر من اولادى
و انشغالى بالعمل والتطوعى و دعاء الناس اللى بخدمهم بقوا مصدر شحن طاقتى اليومى.
ما بقتش مستنية و لا قلقانة و لا خايفة من الوحدة و لا تحديات المرحلة العمرية .
✅ الخلاصة
قصة هذه الجدة قصة مُلهمة لكل اللى فى سنها و رسالة مهمة و جرس تنبيه لكل اللى لسه شغلاهم الحياة بزيادة عن سؤال " ايه اللى ممكن نعمله فى حياتنا عشان ينفعنا فى حياتنا و آخرتنا "
حتى لو نواجه مشهد تيته صفية محتاجين نتعلم من قصة تيته حكيمة 😊👌
ربنا ينور عقولنا الواعية بكل ما يفيدنا و يسعدنا
#امرأة_متميزة
https://www.tg-me.com/+I9xHKqGuP001NTlk
ريهام سمير
BY همسات انثويه(امرأة متميزة)
Share with your friend now:
tg-me.com/moslamawoman/95142